Matthew 14

UJohane Umbhaphathizi Uqunywa Ikhanda

1Ngasonaleso isikhathi uHerodi umbusi wezwa imibiko ngoJesu, 2wasesithi ezincekwini zakhe, “Lo nguJohane uMbhaphathizi; usevukile kwabafileyo! Yikho lokhu imimangaliso isenziwa nguye.”

3UHerodi wayembophile uJohane wamfaka izinsimbi wamphosela entolongweni ngenxa kaHerodiyasi umkaFiliphu umfowabo, 4ngoba uJohane wayelokhu esithi kuye, “Kungaphandle komthetho ukuthi umthathe.” 5UHerodi wayefuna ukumbulala uJohane, kodwa wayesesaba abantu ngoba babesithi ungumphrofethi.

6Ngelanga lesikhumbuzo sokuzalwa kukaHerodi indodakazi kaHerodiyasi yabagidela yamjabulisa uHerodi kakhulu 7waze wathembisa ngesifungo ukuyipha loba yini eyayingayicela. 8Isicetshiswe ngunina yathi, “Ngipha lapha emganwini lo ikhanda likaJohane uMbhaphathizi.”

9Yasidideka inkosi, kodwa kwathi ngenxa yezifungo zayo langenxa yezethekeli zayo yalaya ukuba isicelo leso senziwe. 10Wathi uJohane kahle aqunywe ikhanda entolongweni.

11Ikhanda lakhe lalethwa lisemganwini laphiwa intombazana eyalithwalela kunina.

12Abafundi bakaJohane beza bathatha isidumbu bayasingcwaba. Basebehamba bayatshela uJesu.

UJesu Upha Izinkulungwane Ezinhlanu Ukudla

13UJesu wathi ekuzwa lokho okwenzakalayo wathi nyelele ngesikepe waya endaweni engelabantu. Abantu bezwa ngakho bamlandela ngezinyawo besuka emadolobheni.

14Ekukhuphukeni kwakhe uJesu wabona ixuku labantu elikhulu wabazwela usizi ngakho wasesilisa abagulayo babo.

15Kwathi selithambeme abafundi beza kuye bathi, “Le yindawo esesikhaleni, njalo sekuntambama. Wothi abantu laba kabahambe ukuze bayozithengela ukudla emadolobheni.”

16UJesu waphendula wathi, “Kakudingeki ukuthi bahambe. Bapheni lina ukudla.”

17Baphendula bathi, “Thina esilakho lapha yizinkwa ezinhlanu lezinhlanzi ezimbili.”

18Wathi, “Kuletheni lapha.”

19Wasetshela abantu ukuthi kabahlale phansi etshanini. Wasethatha izinkwa zonhlanu lezinhlanzi zombili wakhangela ezulwini wabonga, wasehlephula izinkwa. Waseziqhubela abafundi, abafundi labo bazinika abantu.

20Bonke badla basutha, abafundi bakhe babutha imvuthu ezasalayo bagcwalisa izitsha ezilitshumi lambili. 21Inani lalabo abadlayo lalingaba ngamadoda ayizinkulungwane ezinhlanu, ngaphandle kwabesifazana labantwana.

UJesu Uhamba Phezu Kwamanzi

22Masinyane uJesu wathi abafundi kabakhwele esikepeni bamandulele ngakuleliyana iphetsheya, yena esavalelisana labantu.

23Esebachithile waya ewatheni lentaba eyedwa wayakhuleka. Kwathi sekuhlwile wayekhonale eyedwa, 24kodwa isikepe sasesingummango omkhulu kusukela okhunjini, siyaluziswa ngamagagasi ngokuba sasiphambana lokubetha komoya.

25Ngesikhathi somlindo wesine ebusuku uJesu waya kubo ehamba phezu kwechibi.

26Kwathi abafundi bembona ehamba phezu kwechibi besaba kakhulu. “Lithonga,” batsho, bekhala ngokwesaba.

27Kodwa uJesu waphanga wathi kubo, “Bekani amaphaphu phansi! Yimi. Lingesabi.”

28UPhethro waphendula wathi, “Nkosi, uma kunguwe, tshono ukuba ngize kuwe phezu kwamanzi.”

29Wathi, “Woza.” Khonapho uPhethro wasephuma esikepeni, wahamba phezu kwamanzi weza kuJesu.

30Kodwa wathi ebona umoya wesaba, kwathi eseqala ukutshona wakhala wathi, “Nkosi, akungisize!”

31Khonokho uJesu welula isandla sakhe wambamba. Wathi kuye, “Wena olokholo oluncinyane, kungani uthandabuzile?”

32Bonela ukungena esikepeni umoya wathula. 33Kwathi labo ababesesikepeni bamkhonza bathi, “Ngempela uyiNdodana kaNkulunkulu.”

34Bathi sebekhuphukile bachaphela eGenesaretha. 35Kwathi abantu bakuleyondawo sebemnanzelele uJesu bathumela ilizwi kuwo wonke ummango wakulelo. Abantu babaletha bonke abagulayo babo kuye 36bamncenga ukuthi avumele labo abagulayo ukuthi bathinte nje umphetho wesigqoko sakhe, kwathi bonke labo abamthintayo basiliswa.